Projektligji i ri për Arsimin e Lartë: Rritet Autonomia dhe Transparenca në Shkollat e Larta.
Projektligji i ri për Arsimin e Lartë i miratuar së fundi nga qeveria garanton rritjen e autonomisë së Shkollave të Larta dhe të transparencës së tyre përballë publikut.
Kjo autonomi sanksionohet fillimisht në zgjedhjet e drejtuesve të këtyre institucioneve. Dekanët dhe rektorët zgjidhen me një votim ku marrin pjesë të gjithë studentët, stafi akademik dhe personeli ndihmës. Votat e studentëve dhe të personelit ndihmës shumëzohen përkatësisht me 20% dhe 5%.
Në bazë të këtij projektligji institucioneve të Arsimit të Lartë ju garantohet autonomi e plotë
- Institucionale,
- Akademike dhe
- Financiare.
Në të sanksionohet e drejta e Shkollave të Larta:
- për të hartuar dhe miratuar statutin dhe rregulloret e tyre,
- për të zgjedhur organet dhe autoritetet e tyre drejtuese,
- për të organizuar strukturat e tyre të brendshme dhe veprimtaritë,
- të drejtën për të zgjedhur personelin akademik dhe administrativ të të gjitha llojeve,
- të drejtën për të caktuar kushte te veçanta të pranimit të studentëve në programet e studimeve,
- të drejtën për hartimin dhe zhvillimin e pavarur të programeve të studimit dhe të projekteve të kërkimit,
- të drejtën për të mbledhur fonde nga donatorët,
- të drejtën për të realizuar marrëveshje të pavarura për studime, trajnime, kualifikime, ose për projekte kërkimore,
- të drejtën për përdorimin e grantit të buxhetit të shtetit,
- të drejtën për të programuar veprimtaritë e tyre, nëpërmjet shërbimeve që sigurojnë burime të tjera financiare, etj.
Këshilli i Administrimit, një organ i ri në universitete,
- do të rrisë efikasitetin në menaxhimin financiar e administrativ të shkollave të larta
- do të rrisë përgjegjësinë e tyre ndaj shtetit dhe taksapaguesve,
- do të rrisë transparencën në përdorimin e fondeve dhe përzgjedhjen e stafit akademik
- si dhe do t'i hapë këto instuticione ndaj shoqërisë.
Zgjedhjet e para të autoriteteve dhe organeve drejtuese në Institucionet e Arsimit të Lartë do të zhvillohen menjëherë me hyrjen në fuqi të këtij ligji.
Projektligji i ri i arsimit të lartë është hartuar me ndihmën e përfaqësuesve nga më të njohurit të stafeve universitare dhe është bazuar në përvojën e legjislacioneve evropiane për arsimin e lartë.
Gjithashtu, kanë dhëne mendime në materialin përfundimtar edhe:
- Të gjitha strukturat e shkollave të larta, që në mënyrë institucionale kanë debatuar dhe paraqitur vlerësimet dhe objeksionet e tyre.
- Këshilli i Arsimit të Lartë dhe Shkencës.
- Ekspertë evropianë, nga më të njohurit në fushën e arsimit të lartë dhe legjislacionit respektiv, si Drejtori i Arsimit të Lartë dhe Kërkimit Shkencor në Këshillin e Evropës, Kryetari dhe ish Kryetari i Komitetit drejtues për arsimin e lartë dhe kërkimin shkencor pranë Këshillit të Evropës, Presidenti i Shoqatës së Universiteteve Evropiane, eksperti i Bankës Botërore që punoi për Masterplanin e Arsimit të Lartë, si dhe ekspertë vendas nga shoqëria civile.
- OJF Universitare, si Kryesia e Kolegjit të Profesoratit, Asambleja e Kolegjit të Profesoratit, Shoqata per Autonomi Universitare, etj.
- Të gjitha ministritë e linjës dhe Këshilli i Ministrave.
Projektligji i ri për Arsimin e Lartë është miratuar nga Këshilli i Ministrave dhe aktualisht është në Parlament për miratimin e tij përfundimtar.
|
|
