REPUBLIKA E SHQIPËRISË

MINISTRIA E ARSIMIT DHE SHKENCËS

Rruga Durësit, nr.23, Tiranë Tel. 04 24 04 68

KËRKESË PËR TEKSTE SHKOLLORE

Në mbështetje të Vendimit të Këshillit të Ministrave nr. 144, datë 8.3.2006, Ministria e Arsimit dhe e Shkencës (MASH) shpall kërkesën për tekste shkollore për vitin shkollor 2006 – 2007, si më poshtë.

1. Për të pajisur shkollat e sistemit arsimor bazë në vitin e ardhshëm shkollor, MASH porosit tekstet sipas tabelës bashkëlidhur.

2. Ftohen të gjitha shtëpitë botuese që të paraqesin variantet e tyre të teksteve për miratim dhe më pas të marrin pjesë në tregun konkurues, i cili do të funksionojë në përputhje me vendimin e mësipërm. Ato e kanë këtë të drejtë pa ndonjë kufizim, nëse e ushtrojnë veprimtarinë e tyre në përputhje me legjislacionin në fuqi dhe nuk kanë probleme të hapura në organet gjyqsore ose prokurori. Secili nga botuesit e interesuar mund të marrë pranë sekretarisë së Bordit të Miratimit të Teksteve (BOMIT) në MASH dokumentat dhe materialet shpjeguese me specifikimet dhe hollësitë e nevojshme për sistemin e ri të sigurimit të teksteve shkollore, për kushtet dhe kërkesat e paraqitjes së teksteve që ofron etj.

3. Dorëshkrimet e teksteve duhet të jenë me përputhje me programet mësimore dhe standardet përkatëse të vendosura nga MASH. Ato kërkohet të kenë një nivel të arrirë shkencor e metodologjik, tregues përshatshëm të cilësisë fizike dhe çmime të arsyeshme që mbështeten në kostot reale.

4. MASH u bën thirrje të gjithë autorëve dhe botuesve të teksteve në përdorim që të ushtrojnë të drejtën e tyre të pronësisë intelektuale mbi këto tekste, duke hyrë në marrëdhënie të drejtpërdrejta ndërmjet tyre, sipas përkatësive në këtë të drejtë. Ata janë krejtësisht të lirë ta ushtrojnë këtë të drejtë pa ndërmjetësinë ose lejen e veçantë nga MASH ose nga ndonjë organ tjetër shtetëror. MASH nuk do të vazhdojë të jetë zotëruese e të drejtës së kopjes (kopirajtit) për cilindo nga tekstet shkollore dhe as nuk ngarkon financiarisht botuesin ose autorin për të drejtën e saj mbi vlerën e editoriale të realizuar në tekstet e botuara nga ish Shtëpia Botuese e Librit Shkollor. MASH synon që në këtë mënyrë t’iu vijë në ndihmë të gjithë botuesve të librit shkollor si dhe autorëve të cilët po hyjnë në një sistem liberal të tregut të teksteve.

5. MASH gjithashtu, nuk do të jetë e përfshirë në asnjë prej hallkave të botimit të teksteve shkollore, duke nënkuptuar që të gjitha ato do të plotësohen nga vetë botuesi, i cili merr në dorë krejt procesin nga hartimi dhe shtypja e deri te shitja dhe shpërndarja në shkolla sipas skemës së re të sigurimit të teskteve shkollore.

6. Nuk pranohet pjesëmarrja me oferta e punonjësve të organeve shtetërore pozicioni i të cilëve është në konflikt interesi me rregullat e konkurencës së tregut të teksteve. Punonjësi i MASH-it, i një Drejtorie Arsimore Rajonale (DAR), i një ZA-je, drejtori ose zëvendësdrejtori i shkollës nuk mund të jenë njëherësh edhe autorë teksti ose pjesë e shtëpisë botuese pjesëmarrëse në sistemin konkurues të tregut të teksteve shkollore. Autori i një teksti shkollor punonjës si më sipër, teksti i të cilit fillimisht ndodh të jetë i vetëm në tregun e përzgjedhjes nga shkollat, dmth të mos ketë tekst alternativ konkurent, i nënshtrohet automatikisht rregullit të konfliktit të interesit që nga çasti kur teksti i tij nuk është më i tillë.

7. Të gjitha tekstet shkollore, duke përfshirë dhe ata që thjesht ribotohen ose që nuk janë të përfshirë në listën e kërkesave për vitin shkollor 2006 – 2007, duhet të kalojnë detyrimisht procesin e miratimit nga BOMIT për t’u çertifikuar. Tekstet që nuk janë të reja do të konsiderohen apriori të pranuara përsa i përket cilësisë pedagogjiko-shkencore, nëse për ta nuk ka kërkesa specifike në këtë drejtim. Gjithsesi, ata i nënshtrohen miratimit për të hetuar plotësimin e kërkesave që lidhen me cilësinë fizike dhe çmimin. Teksti që nuk paraqitet për miratim dhe që nuk e ka marrë atë nuk pajiset me çertifikatën e lejes nga MASH-i dhe si i tillë, nuk do lejohet të qarkullojë në shkollë.

8. Për vitin shkollor 2006 – 2007, pranohen tekste alternative nga botues të ndryshëm për të gjitha lendët ose titujt e listës bashkëlidhur, me përjashtim të titujve të kësaj liste që janë për klasat 1, 2, 4, 5, 6, 8 të shkollës nëntëvjeçare për të cilat do pranohet vetëm ribotimet. Prej këtyre teksteve veprohet ndryshe vetëm për atë të abetares, për të cilën pranohen variante nga botues të ndryshëm.

9. Tekstet që hartohen me programet e reja të porositura sipas kërkesës së MASH-it më 26.07.2005 dhe që ishin për t’u dorëzuar më 15 shkurt të këtij viti, do të dorëzohen nga shtëpitë botuese më 28 prill 2006 dhe do të jenë të pranuara sipas të njëjtave kërkesa minimale të caktuara që më parë. Tekstet e tjera do të dorëzohen më 31 maj. Kërkesat për këto të fundit përshkruhen në materialet që jepen nga MASH.

Dorëzimi i teksteve nga botuesit do të bëhet në MASH, nga ora 9:00 deri në 20:00 nga secili pjesëmarrës veç e veç, sipas rradhës së paraqitjes.

10. Shtëpitë botuese i dorëzojnë tekstet në BOMIT pranë MASH-it në 5 (pesë) kopje të paketuara secila me letër të bardhë dhe të gjitha në një kuti ose letër ambalazhi. Së bashku me kopjet e tekstit, përfshihen dhe tre zarfe të mbyllura, njëri prej tyre i dyllosur. Zarfi i dyllosur ka të dhënat e autorësisë, deklaratën dypalëshe autor-botues për origjinalitetin e tekstit dhe ekskluzivitetin e të gjitha të drejtave për të si dhe listën e të drejtave (kopirajteve) të blera ose huazuara për pjesë të tekstit, nëse ka të tilla. Njëri nga zarfet e padyllosur përmban të dhënat për identitetin e botuesit, kurse tjetri përmban të dhëna që shpjegohen në materialet dhe udhëzimet që jepen nga MASH, ku përshkruhen dhe hollësitë e kushtet e paraqitjes së tekstit nga botuesi.

11. Të gjitha shtëpitë botuese që do të paraqesin tekste për ribotim sipas listës së kërkuar, janë të detyruar që, së bashku me materialet e tjera, të paraqesin kontratën e lidhur ndërmjet tyre.

12. Për vlerësimin e cilësisë fizike, për çdo variant të paraqitur, botuesi duhet të dorëzojë edhe një model teksti të lidhur, i cili përmban faqe të pashkruara dhe tregon për cilësinë e letrës dhe atë të kopertinës, lidhjen në trajtë të përfunduar, etj. Cilësitë fizike të librit shprehen në dokumentin shpjegues që shoqëron ofertën, ashtu si edhe çmimi.

13. BOMIT pranë MASH-it do të vlerësojë tekstet e paraqitura nga botuesit për nga cilësia pedagogjiko-shkencore, të dhënat e cilësisë fizike dhe çmimi. Në përfundim, tekstet miratohen ose jo në përputhje me arritjen e standardeve të vëna nga MASH. Nuk do të ketë tekst fitues, por tekst të miratuar, nëse plotësohen standardet dhe kërkesat e miratimit. Të gjitha tekstet që miratohen do të jenë kandidate të barabarta përkundrejt konkurencës në tregun e përzgjedhjes nga shkollat. Procedurat e mëtejshme janë të shpjeguara në materialet që jepen nga MASH.

14. Ofertat e paraqitura jasht afateve të parashikuara më sipër ose që nuk përmbushin kërkesat e përshkruara më lart si dhe ato që përmbahen në materialet përkatëse të dhëna nga MASH nuk do të shqyrtohen.

15. Materialet shpjeguese do të merren falas në sekretarinë e BOMIT pranë Ministrisë së Arsimit dhe Shkencës. Për çdo informacion të mëtejshëm mund të drejtoheni në këtë sekretari ose me postë elektronike në adresën rkosti@mash.gov.al.