REPUBLIKA E SHQIPËRISË

MINISTRIA E ARSIMIT DHE SHKENCËS

ZYRA E SHTYPIT

Rruga e Durrësit, nr. 23 AL-TIRANË www.mash.gov.al

Dokument jozyrtar për mediat

Tiranë, më 22 maj 2006

NJOFTIM PËR SHTYP

Korçë: Zhvillohet Konferenca Kombëtare: “Arsimimi dhe trajnimi i mësuesve drejt një zhvillimi profesional afatgjatë”

Sot më 22 Maj 2006, në sallën e bibliotekës së qytetit të Korçës, Ministria e Arsimit dhe Shkencës, Qendra e Trajnimit dhe Kualifikimit për Arsimin, (QTKA) me mbështetjen e Bankës Botërore organizuan Konferencën Kombëtare me temë: “Arsimimi dhe trajnimi i mësuesve drejt një zhvillimi profesional afatgjatë”

Në këtë konferencë morrën pjesë ministri i Arsimit dhe Shkencës z. Genc Pollo zv.ministri z. Halit Shamata specialistë të QTKA dhe të Drejtorive e Zyrave Arsimore Rajonale si dhe përfaqësues të Organizatave Jo Fitimprurëse.

“Kemi nevojë për të arritur në këtë qartësi raportesh dhe hierarkie edhe për një sistem të qartë përgjegjësish, – tha gjatë takimit ministri Pollo, - me një strukturë gjithashtu të qartë që organizon në shkallë kombëtare kualifikimet e mësuesit. Kemi nevojë për një rrjet trainerësh të certifikuar mësuesish me kompetenca të qarta dhe të pakontestueshme, që të shërbejë si një shtyllë kurrizore vepruese e sistemit të trainimeve, të cilës në mënyrë periodike do t’i nënshtrohet e gjithë mësuesia.

Jemi mbledhur në këtë Konferencë Kombëtare jo më kot të organizuar në Korcën e shkollës së parë shqipe edhe për të konceptuar një sistem kualifikimesh i cili ecën gradualisht dhe ka shkallëzimin e tij të natyrshëm në mënyrë që të jetë edhe një nxitës e stimulues i meritës dhe i dhënies së mësimit sipas cilësisë që kërkon koha.”

Synimi i kësaj konference ishte zhvillimi dhe implementimi i një sistemi të ri dhe progresiv për aftësimin profesional të mësuesve i cili gjithnjë e më shumë po shihet si një proces që zgjat, i hapur për vlerësim dhe vetë-vlerësim dhe që ka për synim vetë-aktualizimin e plotë profesional.

Nga kjo konferencë pritet të nxiten disa aspekte të vendimarrjes. Qeveria shqiptare në bazë edhe të Strategjisë për Arsimin Parauniversitar 2005-2015 dhe programit të Bankës Botërore “Cilësi dhe Barazi në arsim” do të marrë një sërë vendimesh që kanë të bëjnë me trainimin e vazhdueshëm dhe cilësor të mësuesve për disa zgjidhje sistemike me shkallët e kualifikimit të tyre.

Por për një vendimarrje të re në këtë fushë, duhen zhvilluar skema dhe modele të reja trainimi, për të forcuar kapacitetet trainuese, aftësimin e mësuesve për Gjatë Gjithë Jetës, për të lidhur formimin e mësuesve në universitet me ata në shërbim, për të respektuar marrëveshjen e Bolonjës, për ta liberalizuar sistemin e trainimeve dhe për ti dhënë më shumë kompetenca rajoneve, shkollave si dhe për të rritur rolin e OJF në krijimin e një bashkëpunimi të trainimeve private me ato shtetërore. Kjo e fundit, krijimi i lëvizshmërisë në profesionin e mësuesit, në mënyrë që ky profesion të mos mbetet i mbyllur, është edhe një orientim i Këshillit të Evropës.

Gjatë kësaj konference të gjithë të pranishmit ranë dakord se sistemi i aftësimit profesional të mësuesve në Shqipëri duhet të vlerësohet si një proritet kombëtar për arsimin. Ka ardhur koha që edhe në Shqipëri sistemet e trajnimit duhet të decentralizohen dhe duhet të formulohet korniza e trajnim-kualifikimit të mësuesve në përshtatje me zhvillimet evropiane. Cdo reformë në çdo sistem arsimor nuk mund të jetë realizuar me kurrikula të mira e bashkëkohore pa reformim të sistemit të trainimit dhe kualifikimit të mësuesve.