Tiranë, më 17 Dhjetor 2009

Tafaj në workshop me studentët e ekonomikut: Karta e Bolonjës tashmë është implementuar në të tri nivelet e saj në sistemin tonë të Arsimit të  Lartë.

Ministri i Arsimit dhe shkencës z.Myqerem Tafaj ishte sot i pranishëm në një Workshop me studentë të fakultetit të  Ekonomik të Universitetit të Tiranës, mbi përshtatshmërinë e   Kartës së Bolonjës në sistemin universitar shqiptar, dhe atë të fakultetit Ekonomik në veçanti.

Pas fjalës përshëndetës të rektorit zotit Dhori Kule, fjalën në këtë takim e mori ministri i Arsimit dhe Shkencës zoti Tafaj, i cili përshëndeti studentët dhe pedagogët pjesëmarrës duke vënë theksin në implementimin e suksesshëm të sistemit të Bolonjës në Arsimin e Lartë shqiptar.
“Në  sistemin tonë të Arsimit të  Lartë, Karta e Bolonjës tashmë është implementuar në të tri nivelet e saj . Kjo është një arritje mjaft  madhe e sistemit tonë, një arritje  në radhe të parë e punës së shkëlqyer që kanë bërë pedagogët, rektorët, dekanët. Është një arritje edhe një kontribut edhe i studentëve sepse ju, jeni përballuar me këtë transformim rrënjësor të sistemit. Bolonja është reforma më e thellë e  arsimin e lartë në 100 vitet e fundit. Kjo reformë ka ndodhur në kohë  dhe  në kushte të ndryshme dhe në vende të ndryshme”.

Më tej ministri Tafaj përmendi faktin e kërkesave të shumta që studentët e universiteteve tona dhe në veçanti ata të  fakultetit Ekonomik, kanë për thellimin e studimeve në mastera dhe doktoratura dhe, që me  liberalizimin e vizave, me një Bachelor, studentë tanë  mund të konkurrojnë kudo në botë për të përftuar këto studime të thelluara.

Më tej ministri Tafaj informoi studentë edhe për hapat e ndërmarra nga ministria e Arsimit dhe Shkencës për ekuivalentimin e diplomave si dhe akreditimin e Universiteteve sipas standardeve evropiane në këtë mandat të dytë të Qeverisë Berisha 2.

Në fund të fjalës së tij ministri Tafaj falënderoi organizatorët për takimin,
duke siguruar studentët se diplomat e tyre janë  në  strukturën e standardet e diplomave evropiane. Janë plotësisht të transferueshme, janë plotësisht të njohura.
-Ju do  ta provoni shumë shpejt këtë gjë.- tha në fjalën përmbyllëse ministri Tafaj,- Sapo të liberalizohen vizat, të parët do jeni ju që  do pranoheni lehtazi në çdo shtet evropian për të vijuar studimet e thelluara në mastera dhe doktoratura. Dhe shteti ynë do t’iu mbështesë financiarisht në iniciativat tuaja.